Press Information Bureau

1

PRESS INFORMATION BUREAU

GOVERNMENT OF INDIA

***********

Dated Aizawl, the 3rd November, 2004

Feature:

ENVIRONMENT TITHA TUR ECO TASK FORCE

- PIB*

Army-te hian Shivalik tlangrama thing tam tak phunin ecology chhe tur tuaithar lehna hna an thawk nasa hle a. Hemi avang hian Mussoorie ram a lo mawi leh tak bakah vur a tlak tam phah ta hle.

Hetianga ram hausakna thing leh mau dinthar lehna tura Army rawih an nihna 127 Infantry Battalion (Territorial Army) Ecological Unit-Shivalik Hills leh Garhwal Himalayas-a thing leh mau leh environment humhalhtu tura unit dinte atnga thar thawh leh a ni a. Kum 1982-a din Garhwal Rifles Regimental Centre, Uttaranchal-a Landsdowne-a mi hi hetiang lam atana khawvela enchhinna atana din hmasak ber a ni.

He Unit hi Garhwal Rifles-a inchhunglutin Territorial Army unit anga ding an niin he hna thawk tur hian Uttaranchal Hills-a sipai bangte an inziak lut a. He Unit hi Shivalik Hills leh Garhwal Himalays vela ecology tlachhe mek tundin leh hna thawktu atan ruat an niin ramngaw dinthara lei luangral tur ven hna thawktu an ni.

Kum 25 kalta atang khan Mussoorie atanga km.10-a hlaa awm Chunakhala chu leihnuai thil hlu laihchhuahna hmunpui niin hemi avang hian a chhehvela lui tuite kangin ramsa leh thing leh maute an tlem ta tial tial a. Kum 1979-a Mussoorie-a awm British mi Norman Burlow chuan he Queen of Hills an tih mai tlabal mek a hmuh hian pawi a ti hle a, thil awm dan chu Prime Minister Pi indira Gandhi hnenah thlen thuaiin hemi bawhzui hian environment humhalhtu tur Task Force hranpa din a ni ta a ni.

Unit hian Ministry of Defence, Ministry of Environment and Forest leh Uttaranchal Sorkar nena tanghovin hma an la a. Ministry of Defence hian senso tur tumin Ministry of Environment and Forests hian an hnen atang sum an lachhuak thin. State Forest Department hian technical lam leh project support dang an pe thung.

He Unit hi kum 1982-a Mohand bula Shahjahanpur-a ramngaw din thar lehna hna pek an ni a. Ramngaw dinthar leh bakah Unit hian lei luangral tur ven hna an hma tel bawk a. Kum 1982-1984 chhungin he Unit hian ram hectare 700-a zauvah thing tiak 3,18,000 zet an phun a ni.

Kum 1985 khan 127 Infantry Battalion (TA) Ecological Unit chu thil laihchhuahna ruahman lawk loh nasa tak avang leh thing tam tak kita ecology lama harsatna tawh avanga a mawina hlohva a hlutna hloh mek Mussoorie tlangram chhimlamah sawn an ni a. Unit hna ber chu thil laihchhuahna hmun enfiaha tihdamna hna thawh te, lei luangral tur ven leh Kyarkuli Micro Catchment Development Project hnuaia ramngaw dinthar leh a ni. Hna hautak zet mai an thawh zingah palpin, khuar hnawh, leitha lakkhawm, thlai chin, thlai kara hnim thlawhfai, awmze nei taka thing kih leh tlangram chhengchhia, tuipui zawl atanga feet 5,000-6,000 a sanga thlai tiak phun hnate an thawk.

Pawisa tlakchham bakah sipai bang 200 chauh tha chhawr tur an nei chungin Unit hian ram hectare 3,400-a zauah thing nuai 27 phunin kum 1994 khan thil laihchhuahna hmun26 an siamtha a. Unit hnathawh hi a hlawhtlingin kum 17 zet hnua vur tla hmel hmu tawh lo Mussoorie chuan kum 1997 atang khan vur tla a dawng leh tan ta a ni. Hei chauh hi a la ni lo cheu, Dehradun chuan ruahtui a dawng tam leh ta bawk a. He Unit hian kum 13 zet he hna thawh tur an neih laiin kum 9 chhung an thawk zo ta.

Mussoorie-a project hlawhtling tak an zawh hnu hian Unit hian Aglar Watershed-a ecological project dinthar lehna hna an thawk zawm leh a. Aglar lui hi Yamuna lui peng lian zualte zinga mi a ni. Aglar Watershed Project hi he lui hmar lamin tui a dawnna hmun niin Mussoorie tlangdung kalpeltu a ni. Heng tlangramte hi thingkih nasat vang leh ranchaw an lak nasat avangin a chhengchhiain a ro hle. Ruahtui tlak phak lohna tlangpang lehlama awm a niin a chhimlam pangte chu a rovin ruahtui a dawng tlem hle. Unit chuan he hna hautak tak mai hi inpumpekna leh tihtakzetna nen an thawk a. Unit hian ram hectare 4,400-a zauvah thingtiak nuai 356 phunin project zawh felna tur hian kum 9 dang hun an la nei. He hun la awm chhung hian Mussoorie hnung lam ram hectare 4,000-a zauvah thingtiak nuai 30 an phun leh dawn a ni.

Eco Task Force-in thing an phun nun zat hi thingphun lama mawhphurtu sorkar agency/non-government agency te phun aiin nasa takin a tam. Kum 2000-2001 chhunga thing an phun nun zat chu zaa 75 tlingin khawkhen kumah pawh an phun nun zat hi zaa 70 aia tlem a ni ngai lo. Thingtiak enkawl leh venhim chu kum thum chhunga chhum lo chat lova thawh a niin hei hi thingtiakte hrisel taka a than len theihna tur atana thil duhawm tak a ni.

Mipuite Inrawlhna

Thing phun bakah hian Unit hi project hmun vela mipuite hrilh hriatna programme ang chite thawkin a tul hle a, hei hi hun rei awh tur mah nise a humhalhna kawng awmchhun niin a lang si a ni. Thingtiak humhalh kawngah henglai vela miten tlawmngaia an puiha an rilru an pek a tul hle a. Heng lai vela chengte pawh theikung chi hrang hrangte ching turin fuih an ni bawk a. Thingtlang khaw inbawk khawm tam takten thei huan an siam a. Loneih chauhva innghat thin heng laia chengte hian heng lai vela Eco Task Force member-te kawhhmuhna leh kaihhruaina azarah horticulture lam an bawhzui nasa tawh hle. (PIB Feature)

* Thuziak hi PIB Feature Unit atanga dawn a ni.

03/11/2004

No.A-4/17/2004-pub/AZL 03112004 1030 hrs